एतिहासिक नगर भक्तपुरमा पारिवारिक तनावमा रहेकी एक महिलाको आगो लागेर मृत्यु

भक्तपुर– भूकम्पपीडित तथा पारिवारिक तनावमा रहेकी एक महिलाको आज मृत्यु भएको छ । मध्यपुरथिमि नगरपालिका–५ नगदेश घर भई हाल गठ्ठाघरमा छोराबुहारीसँग बस्दै आएकी करिब ६० वर्षीया गङ्गामाया श्रेष्ठको आगो लागेर मृत्यु भएको महानगरीय प्रहरी वृत्त थिमिका प्रहरी नायब उपरीक्षक प्रवीण श्रेष्ठले बताए । 

मध्यपुरथिमि नगरपालिका गठ्ठाघर र अनन्तलिङ्गेश्वर नगरपालिका बालकोट जोड्ने हनुमन्ते खोलाको डिलमा शरीरमा आगो लागेको ती महिलाको शव बिहान करिब ८ बजे भेटिएको हो । प्रहरीका अनुसार भूकम्पले नगदेशको घर भत्किएपछि गठ्ठाघर बस्दै आएको श्रेष्ठको परिवारमा पटक पटक झगडा हुने गरेको खुल्न आएको छ । प्रहरीको प्रारम्भिक अनुसन्धानमा श्रेष्ठले बिहान घर बाहिर निस्केपछि खोलाको डिलमा लुगा खोलेर खेतमा आफ्नै शरीरमा पेट्रोल खन्याएर आगो लगाई मृत्यु भएको हुन सक्ने प्रहरी नायब उपरीक्षक श्रेष्ठले बताए ।

Labels: Breaking, feature, Photo